Willem Cloete

Oupa Schalk en Willem Cloete

Schalk (Naauwte) Burger

Danie Brink se storie oor Willem Cloete het my gedagtes los gemaak oor dié man. Willem het by oupa Schalk Burger groot geword. Die presiese omstandighede weet ek nie of dalk onthou ek dit maar net nie. Wat ek wel onthou is dat my ma vertel het dat Willem redelik klein was toe oupa hom ingeneem het en dat hy amper soos `n kind in die huis groot geword het. My eerste herinnering aan Willem is dat hy oupa Schalk se Switserse bokke gemelk het en die groentetuin bewerk het, alles op Oupa se erf daar langs die watersloot. Ek dink hy het ook in die kombuis gewerk.

Ek het op twee foto`s afgekom wat elkeen sy eie storie vertel. Op die eerste foto is oupa Schalk, sy jongste dogter Susie en sy derde vrou, ouma Lenie, met Willem voor. Ek skat die foto is in die vroeë dertigs geneem met Willem so ongeveer ses jaar oud. Hulle is op pad êrens heen, dalk om vir tant Susie kollege toe te neem. Die motor dink ek was `n Chev. Daardie tyd het motors nog nie kattebakke gehad nie nie maar `n  karet waarop die bagasie vasgemaak is. Ek kan my net indink hoe vol stof die bagasie geword het! Dit lyk darem of die onderste twee stukke bagasie in  goiingsakke toegemaak is. Daardie jare was daar nog baie hekke op die paaie en ek dink dit was seker Willem se taak om hulle oop te maak.

Die tweede foto is ongeveer in 1940 voor Oupa se huis in die straat geneem. Willem was waarskynlik toe so 13 jaar oud. Die soutbosse langs die watersloot is duidelik sigbaar. Baie van Oupa-hulle se familiefoto`s is op presies hierdie plek geneem, seker maar omdat die soutbosse darem `n soort van natuurlike agtergrond verleen het.

Ek onthou ook dat Willem later jare `n leke-prediker by een of ander sekte geword het. Ek wonder of iemand dalk weet of Willem nog enige naasbestaandes het.